Nuwe Pioneer-kultivar vir besproeiing
Geskryf deur: Pioneer-produkagronoom: Johan Kock
Agtergrond
Die balans tussen insetkoste en wins speel ‘n belangrike rol wanneer die besluit geneem word om onder besproeiing te plant. Die fokus val daarom op die belangrike bestuursbesluite rondom die aanplant van kommersiële mielies. Elke besluit moet goed deurdag wees en berekend geneem word.
Klimaatstoestande kan ’n groot invloed op die suskes van ‘n oes hê. Faktore soos die wisselboustelsel, die grond se fisiese en chemiese toestand, geografiese ligging, plantdatum en tydigheid, plantdiepte, plantpopulasie, rywydte en die praktiese toepassing daarvan met beskikbare implemente kan alles die uiteindelike oes beïnvloed. Doeltreffende bestuur van insekte en plantsiektes is ook ’n belangrike deel van die produksieproses.
Die belangrikste doelwitte met plant is:
- Vestiging van 'n eenvormige plantestand: Dit begin by goeie ontkiemingskrag en saailinggroeikragtigheid, wat bydra tot ’n gelyke en eenvormige opkoms van saailinge en uiteindelik ’n homogene plantestand. Dit vorm die grondslag vir goeie opbrengspotensiaal. Verskeie faktore, waaronder grondvog, temperatuur, plantdiepte, implementakkuraatheid, siektes, insekte en saadkwaliteit, beïnvloed die sukses van vestiging. Ná opkoms word interplantkompetisie ’n belangrike faktor in opbrengsbepaling, terwyl saailinggroeikrag nie meer dieselfde rol speel nie.
- Maksimum ligonderskepping: Veral onder besproeiing, waar relatief nouer rywydtes gebruik word, is doeltreffende ligonderskepping belangrik. Elke mielieplant kan as ’n klein “styselfabriek” beskou word, waar sonligenergie deur fotosintese gebruik word om stysel in die mieliepitte op te bou. Vir optimale fotosintese is dit belangrik om soveel moontlik van die beskikbare sonlig doeltreffend te benut. Dit beklemtoon die belangrikheid van 'n eweredige plantestand oor die grondoppervlak. ’n Eweredige blaredak help om sonlig doeltreffend te onderskep en onnodige ligverlies aan die grondoppervlak te beperk, selfs gedurende die vroeë vegetatiewe groeifases.
- Bestuur van groeiseisoenbeskikbaarheid: Plantdatum beïnvloed die groeiseisoen van mielies, onder meer deur die aantal hitte-eenhede wat gedurende die seisoen beskikbaar is. Dit is op sy beurt gekoppel aan kultivarkeuse en beïnvloed wanneer die mielieplant sal blom. In 'n goed beplande wisselboustelsel is die doel om hoë temperature en droogtetoestande tydens die kritieke blomfase te vermy. Onder besproeiing en met die buigbaarheid wat Pioneer-genetika bied, kan hierdie doelwitte beter bestuur word.
Kultivarkeuse is dus een van die belangrikste besluite wat ’n boer in besproeiingsmielieproduksie neem. Teen hierdie agtergrond stel Pioneer graag die nuwe witmieliekultivar vir besproeiing, P14197WPW, bekend. P14197WPW beskik oor PowerCore™-tegnologie. Dit bied ook die opsie om Roundup® as deel van ’n onkruidbeheerprogram te gebruik, terwyl dit beskerming teen sekere wurmskade bied.
Figuur 1: P14197WPW word as die verwysingspunt (0 kg/ha) gebruik om opbrengsverskille teenoor ander kultivars te toon.
- Die swart lyn in Figuur 1 verteenwoordig P14197WPW as die verwysingspunt (0 kg/ha) vir opbrengsverskille teenoor ander kultivars.
- Die Impact-data in die Noord-Kaapse besproeiingsgebied toon dat P14197WPW sterk presteer teenoor alle vergelykende kultivars wat groeilengte betref. P14197WPW het DKC 62-37BR, PAN 3P-973PW en X13H891PW onderskeidelik met 710 kg/ha (13 lokaliteite), 1 050 kg/ha (13 lokaliteite) en 230 kg/ha (12 lokaliteite) oortref.
- Soos Figuur 1 aantoon, het die nuwe PowerCore™-produk P14197WPW ook 380 kg/ha beter as P1518WBR presteer, gebaseer op data van 13 lokaliteite. Dit dui op goeie genetiese vordering, tesame met tegnologie wat help om wurmskade te bestuur.
Saalinggroeikrag is aanvaarbaar en dra by tot ‘n eenvormige opkoms. ’n Eenvormige plantestand bied ’n goeie grondslag vir opbrengspotensiaal. Staanvermoé is sterk.
Plante is nagenoeg 2.43 m lank met koppe wat op ongeveer 52% van die plantlengte gedra word. Met ’n kophoogte van ongeveer 1,23 m is die produk goed geskik vir oes.
Die kopdeursnee (52.4 mm) en koplengte (153.4 mm) Is binne aanvaarbare parameters. Onder besproeiing speel meerkoppigheid nie ‘n bepalende rol nie. Skepelmassa, asook die konstantheid van kopvorming en graanvulling, speel ’n belangrike rol in die bepaling van opbrengs.
